ताजा सामाग्री

सन्दर्भ लेख हरु

समाज

Thursday, December 8, 2022

नलेखिएको प्रेम कथा

ममी साच्चै त्यो अङ्कल कहाँ हुनुहुन्छ ? आजकल त भिडियो कल मा नि बोल्नुहुन्न ! त्यो मलाई गरिब मान्छे र धनि मान्छे बीच फरक सिकाउने अङ्कल क्या ! 

छोरीको मुख बाट अकस्मात आएको यो प्रश्न न म सँग कुनै उत्तर छ न कुनै सम्झना को चिनो नै बाकि छ ! न सम्झना दर्साउने कुनै उपहार नै म सँग छ ! छ त खालि उसले मुटु बिझाउने गरि दिएको मायाको असिमित याद हरु अनि उसले मायाको भिक मागेको बचन हरु जुन मलाई बाचुज्नेल कान मा गुन्जिने गरि छोडेर गएको छ कहिले नफर्किने गरेर ! हुन त उसले बाचुन्जेल मायाको अभाब फील भएको दिन म जिउदो हुनेछु तिम्रो जिबन मा फर्केर यसै गरि मायाको असिमित सागरमा डुबाउन आउनेछु भन्दै दिएको बचन समेत म सँग जिउदो सम्झना बनेर बसेकै छ।

एउटा अन्जान मान्छे फगत फेसबुक को कुना बाट टुप्लुक्क चिहाउन आएको एउटा मान्छे न कुनै साइनो छ न कुनै आफ्नोपन तर खोइ मेरो जिबन मा किन यसरि आउन सक्यो म आफै कहिले बुझ्न सकिन।  मेरो मन मा कसरि बास बस्न आयो त्यो समेत मैले कहिले कल्पना गर्न सकिन।  मेरो कल्पना भन्दा बाहिर को मायाको सागर मा डुबाउन आयो हुरी बतास झैँ आधिबेहरी झैँ थाम्न नसकिने एउटा ठुलो झोक्का बोकेर आयो अनि उसै गरि स्मृति मा रहने गरि गयो म आफुलाई काबु राख्न नसक्ने किन बनायो म कल्पनामा डुब्नु पर्ने किन बनाउन सक्यो मैले किन आफुलाई सम्हाल्न सकिन कतै भगवान ले साच्चै मलाइ खुसि को सागरमा डुबाउन सक्ने एउटा स्मृति बन्न पो आयो कि ?

सामान्य फेसबुक को चिनाजानी बाट सुरु भएको साथित्वको नाता लाइ उसले कसरि मेरो मन सम्म को यात्रा गर्न सक्यो भन्ने जवाफ मैले बनाउन नै सकिन।  जिबन को त्यो समय म थोरै बिचलित भएको त्यो पल जुन बेला म आफुलाई अभागी वा भाग्यमानि के हो चिन्न नसकेको बेला उसैको आग्रहमा फेसबुक च्याट लाइ दैनिकी बनाउन सक्ने खुबी बोकेर मेरो जिबन मा प्रवेश गरेको त्यहि मान्छे च्याट लाइ शब्द भन्दा माथि पुर्याउन सक्ने बन्यो अनि सुरु भयो उसको मिठो मन पगाल्न सक्ने बोलि सुन्दै निद्रा बोलाउन बाध्य हुने म सँग को एउटा जिन्दगि बनेर।

शहर को भिड बाट टाढिन मन लाग्यो किन किन मैले केहि गुमाए कि केहि पाउदैछु छुट्याउन सक्ने अबस्था बाट मैले पार पाउनु पर्ने देखिन थाल्यो जिबन मा।  अनि सुरु गरे एउटा यात्रा शहर छोडी केहि दिन लाइ गाउ जाने एउटा अवसर जुट्यो सायद समय ले मलाइ उसै सँगको नमिठो बिछोड लाइ केहि मलहम लगाउने एउटा साइत पो थियो कि । म शहर छोडी गाउ पुगेँ जहाँ म उसको सम्झनालाई भुलाउने केहि मेसो पाउन सक्थे।  पारिवारिक जमघट र चाडपर्ब मा भुल्ने कोशिस मा रहदै गर्दा उसको याद ले पछ्याउन छोडेकै थिएन त्यसै बीच उसले पटक पटक मलाइ सम्झेको भान गराउदै थियो फेसबुक खोले पिच्छे उसले फोटो मन पराएको नोटिफ़िकेशन फेसबुक को कुना मा झुल्किरहन्थ्यो टिकटक खोल्यो उसैले मेरो भिडियो लाइक गरेको रातो नोटिफ़िकेशन कुनामा आइरहेकै हुन्थ्यो अझै फेसबुक मा मेसेज गर्न समेत भ्याउथ्यो सन्चै छौ ?? खाना खायौ ?? त्यति ले मात्र नपुगेर मोबाइल फोन मै कल समेत देख्न पर्थ्यो जुन म जानी जानी मिस्ड कल मा रुपान्तरण गरिदिन्थे।  जुन याद र सम्झना लाइ म एउटा मिठो बिगत मै रहोस भुत बनेर नतर्साओस अनि भबिष्य माथि हमला नगरोस चाहन्थे त्यहि बिगत ले मलाइ पटक पटक झस्काउदै गर्दा आफुलाई सम्हाल्दै फेसबुक मा ब्लक अप्सन थिच्नै लाग्दा उसले मायाको भिक मागेको याद ले नमिठो गरि चिमोटी दियो अम्ला हरु अनायसै रोकिन पुग्यो म के गरु र नगरु को दोधार मा अड्किन पुगेछु मुटु चिसो भएको अनुभूति अकस्मात भइदियो।  फेसबुक छोडी टिकटक मा छिर्दा उसै गरि रातो नोटिफिकेशन ले मन मा नराम्रो गरि चिमोटिदियो।  मैले आफुलाई सम्हाल्न नै सकिन टिकटक मा उसले नदेखोस चाहना ले उसलाई ब्लक दिस युजर अप्सन मा अम्ला आफै पुगे अनि सदाको लागि टिकटक मा उसको नाम ब्लक लिस्ट मा पुर्याउन सफल बने ।

टिकटक मा मलाइ किन ब्लक गर्नुभएको ? मलाइ तिमि भनेर असिमित मायाको आभास गराउने मान्छे अचानक यस्तो प्रश्न मेरो फेसबुक मा पाउदा मैले स्पस्ट बुझ्न सके आज उसले निद्रा पाउन सक्दैन।  उसलाई यस्ता साना तिना मेरा व्यवहार ले नराम्रो गरि मन चस्काउछ अनि उसलाई निद्रा बोलाउन कठिन हुन्छ भन्ने आभाष मैले गरिसकेको थिएँ।  तर मलाइ त्यो उसको निद्रा सँग कुनै लेनादेना थिएन किन कि उसको मायाको कारण मैले गुमाएको निद्रा फिर्ता गर्नु थियो मलाइ।  म आफु जिबन मा साच्चै मिठो निदाउन चाहन्थे जुन निद्रा बिथोल्ने उसको याद लाइ सधै को लागि अन्त्य गर्नु मेरो चाहना हो भनेर आफैलाई बुझाउन सक्ने बन्नु थियो मलाइ।

आफ्नो जिबन को असिमित पिडा लाइ साम्य पार्न चाहिरहेकी म उसको आफ्नोपन र प्राप्त गर्न नसक्ने मायाको कारण म माथि परिसकेको बज्रपात लाइ जसरि पनि आफ्नो जिबन बाट शितल बाटो र उपयुक्त निकास को चाहना मा अल्झिएकि थिए।  त्यति मात्र थिएन म उसको बारम्बार आउन सक्ने मेसेज को प्रहार बाट बच्नु समेत अनिवार्य भई सकेको अबस्थामा गुज्रिसकेको थिएँ।  म निद्राको खोजीमा लागेँ।  आफ्नो मोबाइल को नेट बन्द गरे चुपचाप आफु भुल्ने कोशिस गर्दै निदाउन खोजें।

सपनामा फेरी उही मान्छे आयो मेरो निद्रा बिथोल्न जे नहोस भन्थे म त्यहि भयो उसको निनाउरो अनुहार मेरो अगाडी पर्दा मलाइ समेत बिचलित बनाउन सक्ने खुबी उसको माया र आफ्नोपनमा थियो नै।  म नतमस्तक बनें।

कान्छी ! उसले बोलाउने प्यारो सब्द उसको मुख बाट नसुनेको धेरै भएको थियो अकस्मात त्यहि सब्द मेरो कान मा गुञ्जायमान भयो।  मा सपनामा छु कि बिपनामा आफैलाई छुट्याउन सक्ने अबस्था बाट बाहिर पुगें।

कान्छी ! म किन तिमि सँग यति नजिक भएँ म आफैलाई थाहा छैन तर जे भयो नराम्रो भयो लाग्दैन तिमीले भने जस्तै तिम्रो लागि म कुनै काम को छैन हुदै होइन म तिम्रो काम को मान्छे हुदै होइन।  तर कान्छी जुन दिन तिमि मेरो नजीक पर्यौ फेसबुक मा चिनाजानी भयो सब्द हरु प्यारो लाग्न थाल्यो तिम्रा कति कुरा हरु जानी नजानी सुन्न थाले त्यसपछि मैले तिमीमा एउटा मायाको असिमित फुलबारी भेट्न सकें।  मैले चाहे जस्तै मैले खोजे जस्तै असिमित प्यार को एउटा मुहान भेटेको आभास हुन थाल्यो।  सब्द बाट सुरु भएको हाम्रो सम्बन्ध बिस्तारै आवाज मा परिणत हुन पुग्यो।  मिठो सुनिरहू लाग्ने आफ्नोपन मिसिएको आवाज मा मैले असाध्यै मिठो स्वाद भेटाउन थालें।  कस्तो स्वाद थियो नि कुनै शब्द ले बयान गर्ने नसकिने स्वाद धेरै प्रकार का मौषमी फल हरु मिसिएको जस्तो मिठास।  भुल्न नसकिने मिठास।  मन्त्रमुग्ध म तिम्रो आफ्नोपन म हराएकै हो।  एउटा सुन्दर बंगैचामा फुलेका असिमित सुन्दर फुल हरु को मिश्रण मैले तिमि मा पाउन थालें।  असिमित रङ्गीन फूलहरुको को सुवास घोलिएको तिम्रो आफ्नोपन मा डुब्न पाउदा मैले आफुलाई असाध्यै भाग्यमानि अनुभूति गर्न थालें। यो अनुभूति लाइ जिबन पर्यन्त जोगाएर राख्ने मेरो चेस्टा लाइ तिम्रो सामु पोख्न चाहें।

मलाइ लाग्छ कान्छी मैले केहि गल्ति गरें त्यो मिठास अनि आफ्नोपन को साथ प्राप्त भएको सुन्दर संसार लाइ उजाड नबनाई आफैमा खुसि हुने बाताबरण तयार गर्नु पर्छ जसले गर्दा म बाट तिमीलाई अनि तिमि बाट मलाइ कुनै असर गर्न नसक्ने अवस्था बनाउदै यो हाम्रो संसार लाइ जोगाउनु भन्ने कुरा तिमीलाई सिकाउन बताउन नसक्नु नै मेरो कमजोरी भयो।  तिम्रा अतित अनि तिम्रा जिबन मा रहेका केहि तिता कुरा हरुलाई हामीले हाम्रो जिबन मा असर नगर्ने गरि मेटाउन सक्नु पर्छ भनेर तिमीलाई बताउन नै सकिन मैले अझै बुझाउन नै सकिन।

बुझाउने कोसिस गर्दै गरें तर त्यतिन्जेल ढिला भैसकेको थियो तिमीलाई बताउनु पर्ने समय मा तिमि बाट म केहि दिन ओझेल पर्नुपर्यो।  मेरो काम को सिलसिला त्यस्तै थियो कान्छी ! त्यसै बेला तिम्रो मन मा आएको बिचलन रोक्न मैले सकिन र तिमीले त्यसैको फल भोग्नु पर्यो जसले गर्दा तिमि झन बिचलित हुन पुग्यौ।

म सँग को सामिप्यता गलत हो भन्ने भान पार्नु अगि नै मैले तिमीलाई धेरै सम्झाउन सक्नुपर्थ्यो त्यहि मैले गल्ति गरे।  त्यसपछि जसरि भए नि तिमीलाई त्यो बास्तबिकता बुझाउन सक्ने हुन्छु भनेर तिमि सँग हरेक दिन समय मागें तर तिमि आतिसकेकी थियौ आफुले गलत गरेको भान परिसकेको थियो तिमीमा।  म सँग का केहि कुरा हरु याद गर त् म तिमीलाई सुनौलो भबिस्य कसरि बनाउन सकिन्छ त्यसको लागि तिमीले के गर्न सक्नु पर्छ बुझाउने कोसिस गरेको थिएँ नि र तिम्रो लागि उत्तम विकल्प त्यहि रहेको पनि थियो।  तिमीले अझै पढ्नु पर्छ आफुलाई अगि बढाउनु पर्छ कान्छी ! मैले तिम्रो वरपर हरियाली देखेकै छैन अझै अन्धकार भबिस्य देखिरहेको छु।  संका नै संका ले घेरिएको तिम्रो जिबन मा आफुले आफुलाई सम्हाल्दै बलियो बन्न सकिनु भने तिमि कहिले खुसि हुन् सक्दिनौ भन्ने कुरामा म बिश्वस्त छु।  म तिमीलाई माया गर्ने मान्छे तिम्रो उज्वल भबिस्य हेर्न चाहने मान्छे।  मलाइ तिमीबाट अब केहि चाहिएकै छैन खालि तिमि खुसि भएको हेर्नु छ तिमीले आफ्नो मान्छे सोचेर जिबन मा आफ्नो प्रगति मलाइ सुनाएको हेर्ने रहर छ।  तिम्रो खुसि मा भाजो हाल्ने षडयन्त्र म बाट हुने छैन खालि चाहन्छु तिम्रो सुन्दर भबिस्य। 

कान्छी तिमीलाई जुन बाटो हिडाउन खोजिएको छ त्यो तिम्रो लागि बनेको बाटो नै होइन तिम्रो उज्वल भबिस्य को बाटो भनेको तिम्रो आगामी दिन मा आफुलाई खरो बनाएर अनि म जिबन मा जे पनि आफु एक्लै गर्न सक्छु भन्ने बनाउन जरुरि छ।  तिमि खुसि हुनु पर्ने मान्छे हौ।  कान्छी फूलबारीको सुवास मा पुतली हरु नाचेको हेर्नु पर्ने तिम्रो जिबन मा झिंगा भन्केको देखेको छु।  तिमि आफुलाई याद गर त तिमि कति कम्जोर भएकी छौ साना झोक्काले नि उदाउन सक्ने भएकी छौ।  म चाहन्छु तिमीलाई साना झोक्का ले होइन आधिबेहरी ले समेत हल्लाउन नसक्ने बन्नु छ।  कान्छी म चाहन्छु तिमीलाई मैले कुरा बुझाउन सकु खुसि दिन सकु जिबन मा गलत गरेको आभास तिम्रो मन मा कहिले आउन नदिन सकु आफैमा सक्षम भएर जिबन का हरेक क्षण खुसि साथ बिताएको हेर्न सकु।  तिमि भित्र को सम्भाबना लाइ कुल्चिएर अगाडी बढ्ने कदम रोकिएको हेर्न सकु।  मलाइ केहि भन्न आइरहेकै छिन तर धेरै कुरा भन्न बुझाउन अनि सिकाउन मन छ।  कसरि सक्छु थाहा छैन तर म त्यो हेर्न पाउने भाग्यमानी बन्न चाहन्छु।

कान्छी म तिमीलाई आफूभन्दा धेरै माया गर्छु अरु के भनु ! 

मन ढक्क भयो अकस्मात म रुन थालें।

ममी ! ममी ! के भयो ?? छोरी ले जबर्जस्ति ठेलेर बिउझाइदि। सपना के देखें किन पुरा देख्न सकिन उसले मलाइ देखाउन खोजेको बाटो के थियो ? साच्चै बिपनामा उसले भन्न चाहेको के थियो ?

मलाइ भुत ले बर्तमान मा किन यति सास्ती दिदैछ भबिस्य के चाहन्छ ??? मैले आफुलाई दरो बनाउन झन् नसकेको आभास हुदै छ।  अनायासै प्यास लाग्यो पानि पिएँ तर पानि ले त्यो प्यास मेटाउन सकेको अनुभूति गर्नै सकिन।

आखिर साच्चै भन्न नसकेको मायाको प्यास यस्तै हुने रहेछ त ???

 

फागुन २२ गते सोमबार राति १०:५२  बजे

Read more ...

Sunday, May 15, 2022

बैङ्किङ्ग कसूर तथा सजाय ऐन, २०६४


बैङ्किङ्ग कसूर तथा सजाय ऐन २०६४ 

प्रमाणीकरण र प्रकाशन मिति  २०६४।१०।२३ 

व्यवस्थापिका–संसदले बनाएको २०६४ सालको ऐन न. ३५ 
(बैङ्किङ्ग कसूर तथा सजायका सम्बन्धमा व्यवस्था गर्न बनेको ऐन )

प्रस्तावना : बैङ्क तथा वित्तीय संस्थाको कारोबारमा हुन सक्ने कसूरजन्य कार्यबाट बैङ्क तथा वित्तीय प्रणालीमा पर्ने असर र जोखिमलाई न्यून गरी बैङ्क तथा वित्तीय प्रणालीप्रति विश्वसनीयता अभिवृद्धि गर्न बैङ्किङ्ग कसूर तथा सजायका सम्बन्धमा कानूनी व्यवस्था गर्न वाञ्छनीय भएकोले व्यवस्थापिका संसदले यो ऐन बनाएको छ । 

परिच्छेद–१ 
प्रारम्भिक 

१. संक्षिप्त नाम, विस्तार र प्रारम्भ : (१) यस ऐनको नाम “बैङ्किङ्ग कसूर तथा सजाय ऐन २०६४” रहेको छ । 
(२) यो ऐन नेपालभर लागू हुनेछ र नेपालमा बैङ्किङ्ग कसूर गरी विदेशमा रहे बसेको जुनसुकै व्यक्ति वा संस्था समेतलाई लागू हुनेछ । 
(३) यो ऐन तुरुन्त प्रारम्भ हुनेछ । 

२. परिभाषा : विषय वा प्रसङ्गले अर्को अर्थ नलागेमा यस ऐनमा : 
(क) “बैङ्क” भन्नाले प्रचलित कानून बमोजिम ‘क’ वर्गको वित्तीय कारोबार गर्न नेपाल राष्ट्र बैङ्कबाट इजाजतपत्रप्राप्त संस्था सम्झनु पर्छ । 
(ख) “बैङ्किङ्ग कसूर” भन्न्नाले परिच्छेद–२ बमोजिमको कसूर सम्झनु पर्छ । 
(ग) “वित्तीय संस्था” भन्नाले प्रचलित कानून बमोजिम ‘ख’ ‘ग’ र ‘घ’ वर्गको वित्तीय कारोबार गर्न नेपाल राष्ट्र बैङ्कबाट इजाजतपत्रप्राप्त संस्था सम्झनु पर्छ । 
(घ) “संस्था” भन्नाले बैङ्क वा वित्तीय संस्थामा प्रचलित कानून बमोजिम खाता खोल्न सक्ने फर्म वा कम्पनी सम्झनु पर्छ र सो शब्दले प्रचलित कानून बमोजिम स्थापित अन्य सङ्गठित संस्था वा एजेन्सी समेतलाई जनाउँछ । 
(ङ) “ऋणी” भन्नाले बैङ्क वा वित्तीय संस्थाबाट ऋण लिने व्यक्ति, फर्म, कम्पनी वा प्रचलित कानून बमोजिम स्थापना भएको सङ्गठित संस्था सम्झनु पर्छ र सो शब्दले जमानत दिने व्यक्ति समेतलाई जनाउँछ ।  
 
परिच्छेद–२ बैकिङ्ग कसूर 

३. अनधिकृत रुपमा खाता खोल्न वा रकम भुक्तानी माग गर्न नहुने : कसैले पनि बैङ्क वा वित्तीय संस्थामा खाता खोल्दा वा रकम भुक्तानी माग गर्दा देहायको कार्य गर्न हुँदैन :  
(क) नक्कली कागजात पेश गरी खाता खोल्न वा जानी जानी खाता खोलिदिन, 
(ख) कानून बमोजिम बाहेक काल्पनिक वा अन्य व्यक्ति वा संस्थाको नाममा खाता खोल्न वा खाता खोलिदिन, 
(ग) आफुले काटेको चेकलाई खाम्ने रकम आफ्नो खातामा नभएको जानी जानी चेक काटी भुक्तानी लिन वा दिन । 
४. अनधिकृत रुपमा चेक, चेकबुक वा बैङ्क विवरण प्राप्त गर्न वा दिन नहुने : 
(१) कसैले पनि अनधिकृत रुपमा कुनै तरिकाले झुक्याई वा आफ्नो हो भनी विश्वास दिलाई अन्य व्यक्तिको चेक, चेकबुक वा खाताको विवरण माग गर्न वा प्राप्त गर्न हुँदैन । 
(२) कसैले पनि अनधिकृत रुपमा एउटा व्यक्ति वा संस्थाको चेक, चेकबुक वा खाताको विवरण सम्बन्धित व्यक्तिले लिखित रुपमा अनुरोध गरेकोमा बाहेक अर्को कुनै व्यक्ति वा संस्थालाई दिन हुँदैन । 
५. अनधिकृत रुपमा रकम निकाल्न वा भुक्तानी दिन नहुने : कसैले पनि बैङ्क वा वित्तीय संस्थामा रहेको खाताबाट रकम निकाल्दा वा भुक्तानी दिंदा देहायको कार्य गर्न हुँदैन  :
(क) अनधिकृत रुपमा अन्य व्यक्तिको खाताबाट रकम निकाल्न, 
(ख) अन्य व्यक्तिको चेक चोरी गरी वा अन्य कुनै तरिकाले प्राप्त गरी त्यस्तो चेकबाट रकम निकाल्न, 
(ग) अनधिकृत रुपमा ग्राहकको खाताबाट रकम रकमान्तर गर्न वा नगद भुक्तानी दिन, 
(घ) कुनै पनि किसिमको नक्कली वा अन्य व्यक्तिको विनिमेय अधिकारपत्र, चेक, ड्राफ्ट वा यस्तै प्रकारका अन्य साधनहरु अनधिकृत रुपमा प्राप्त गरी नगद लिन वा भुक्तानी दिन । 
६. बिधुतिय माध्यमको दुरुपयोग वा अनधिकृत प्रयोग गरी भुक्तानी लिन वा दिन नहुने : कसैले पनि क्रेडिट कार्ड, डेबिट कार्ड, अटोमेटेड टेलर मेशिन (एटीएम) कार्ड वा अन्य बिधुतिय माध्यमको दुरुपयोग वा अनधिकृत प्रयोग गरी भुक्तानी लिन वा दिन हुँदैन । 
७. अनधिकृत रुपमा कर्जा लिन वा दिन नहुने : कसैले पनि बैङ्क वा वित्तीय संस्थाबाट कर्जा लिंदा वा दिंदा देहायको कार्य गर्नु हुँदैन : 
(क) गलत, झुट्टा वा नरहे नभएको वित्तीय विवरण पेश गरी वा कृत्रिम व्यवसाय खडा गरी कर्जा लिन वा दिन, 
(ख) धितोको अस्वाभाविक रुपमा बढी मूल्याङ्कन गरी कर्जा लिन वा दिन, 
(ग) झुट्टा विवरणको आधारमा परियोजनाको लागत अस्वाभाविक रुपमा बढाई बढी कर्जा लिन वा दिन, 
(घ) आफु लाई प्राप्त भएको अख्तियारी वा स्वीकृत सीमाभन्दा बाहिर गई कर्जा, सुविधा वा सहुलियत प्राप्त गर्न वा उपलब्ध गराउन, 
(ङ) कुनै एक बैङ्क वा वित्तीय संस्थालाई एकपटक दिइसकेको सुरक्षण रीतपूर्वक फुकुवा नभई वा सो सुरक्षणले खामेको मूल्यभन्दा बढी हुने गरी सोही सुरक्षण अर्को बैङ्क वा वित्तीय संस्थामा राखी पुनः कर्जा लिन वा दिन, तर सहवित्तीयकरण अन्तर्गत प्रवाह हुने कर्जाको फुकुवाको हकमा यो बन्देज लागू हुने छैन । 
(च) वास्तविक रुपमा व्यवसाय सञ्चालन गर्न सक्ने वित्तीय हैसियत नभएको वा आफुले अनुचित प्रभाव पार्न सक्ने व्यक्तिको नाममा संस्था संस्थापना गराई त्यस्तो संस्था मार्फत कर्जा लिन वा त्यस्तो कुरा जानी जानी कर्जा दिन, 
(छ) ग्राहकको कारोबारको तुलनामा आवश्यकताभन्दा बढी कर्जा दिन,  
(ज) कर्जा सुविधा उपलब्ध गराए बापत कुनै किसिमको अनुचित लाभ लिन वा दिन । 
८. कर्जाको दुरुपयोग गर्न नहुने : कसैले पनि बैङ्क वा वित्तीय संस्थाबाट जुन प्रयोजनको लागि कर्जा सुविधा लिएको हो सोही प्रयोजनमा नलगाई अन्यत्र प्रयोग गरी वा गराई कर्जाको दुरुपयोग गर्नु वा गराउनु हुँदैन । 
९. बैङ्किङ्ग स्रोत, साधन र सम्पत्तिको दुरुपयोग गर्न नहुने : 
(१) बैङ्क वा वित्तीय संस्थाको संस्थापक, सञ्चालक, प्रचलित कानून बमोजिम वित्तीय स्वार्थ रहेको मानिने शेयरधनी, प्रमुख कार्यकारी अधिकृत, कर्मचारी, सल्लाहकार, मेनेजिङ्ग एजेण्ट वा सम्बद्ध व्यक्ति वा संस्था वा त्यस्तो व्यक्तिका परिवारका सदस्य वा नजिकका नातेदारले बैङ्क वा वित्तीय संस्थाबाट कर्जा वा सुविधा लिई वा अन्य कुनै तरिकाले बैङ्क वा वित्तीय संस्थाको स्रोत र साधनको दुरुपयोग गर्न हुँदैन । 
तर 
(१) बैङ्क वा वित्तीय संस्थाका प्रमुख कार्यकारी अधिकृत वा कर्मचारीले प्रचलित कानून बमोजिम कर्मचारी सुविधा अन्तर्गतको कर्जा वा सापटी लिन बाधा पुर्याएको  मानिने छैन ।  
(२) नजिकको नातेदारलाई बैङ्क वा वित्तीय संस्थाको सञ्चालक समितिको स्वीकृति लिई कर्जा वा सुविधा दिन बाधा पर्ने छैन । 
स्पष्टीकरण : यस उपदफाको प्रयोजनको लागि,– 
(क) “परिवारका सदस्य” भन्नाले सम्बन्धित व्यक्तिको पति वा पत्नी, छोरा, छोरी, धर्मपुत्र, धर्मपुत्री, बाबु, आमा, सौतेनी आमा र आफुले पालन पोषण गर्नु पर्ने दाजु, भाई र दिदी, बहिनी सम्झनु पर्छ ।  
(ख) “नजिकको नातेदार” भन्नाले भिन्न भएका दाजु, भाई, भाउजु, बुहारी, विवाहिता दिदी, बहिनी, भिनाजु, ज्वाइँ, भतिजा, भतिजी, साला, साली, सासू, ससुरा, काका, काकी, मामा, माईजु, भाञ्जा, भाञ्जी, नाति, नातिनी, नातिनी बुहारी, नातिनी ज्वाइँ सम्झनु पर्छ । 
(२) कसैले पनि निक्षेपकर्ता वा बैङ्क वा वित्तीय संस्थाको हित प्रतिकूल हुने गरी बैङ्क वा वित्तीय संस्थाको सम्पत्ति खर्च गर्न गराउन हुँदैन । 
(३) कसैले पनि गैर बैङ्किङ्ग सम्पत्ति लगायत बैङ्क वा वित्तीय संस्थाको अन्य सम्पत्ति लिलाम बिक्री गर्दा वा अन्य कुनै कारोबार गर्दा कुनै आर्थिक अनियमितता गर्नु हुँदैन । 
१०. भाखा नाघेको ऋणीले सम्पत्ति प्राप्त गर्न वा खाता खोल्न नहुने : कुनै भाखा नाघेको ऋणीले बैङ्क वा वित्तीय संस्थालाई तिर्नु पर्ने कर्जा नतिरी स्वदेश वा विदेशस्थित बैङ्क वा वित्तीय संस्थामा खाता खोली रकम राख्न वा त्यस्तो खातालाई निरन्तरता दिन वा सञ्चालन गर्न वा अन्य कुनै तरिकाले कुनै चल वा अचल सम्पत्ति खरिद गर्न वा त्यस्तो सम्पत्तिउपर कुनै तरिकाले हकभोग प्राप्त गर्न हुँदैन । कुनै ऋणीले वित्तीय संस्थाको भाखा ननाघ्दै स्वदेश वा विदेशमा कुनै चल वा अचल सम्पत्ति प्राप्त गरेको वा खाता खञ्चालन गरी निरन्तरता दिई आएको रहेछ भने ऋणीले त्यस्तो सम्पत्ति वा बैङ्क खाताबाट प्राप्त हुने रकम कर्जा तिर्न प्रयोग गर्नु पर्नेछ ।  
११. ऋणीको चालू परियोजनालाई नोक्सान हुने गरी ऋण वा सुविधा रोक्न नहुने : बैङ्क वा वित्तीय संस्थाले ऋणीको कुनै परियोजनाको लागि कर्जा वा सुविधा स्वीकृत गरी पहिलो किस्ता प्रदान गरिसकेपछि पर्याप्त आधार र मनासिब कारणविना ऋणीको चालू परियोजनालाई नोक्सान हुने गरी बाँकी किस्ता कर्जा वा सुविधा दिन बीचमा रोक्न हुँदैन । 
१२. कागजात वा खाता बही सच्याई कीर्ते वा जालसाजी गरी हानि नोक्सानी पुर्याउन नहुने : कसैले पनि बैङ्क वा वित्तीय संस्थाको कुनै कागजात वा खाता बहीमा लेखिएको कुनै कुरा कुनै तरिकाले हटाई वा उडाई अर्कै मतलब निस्कने व्यहोरा पारी मिलाई लेख्ने जस्ता काम गरेबाट आफुलाई वा अरु कसैलाई फाइदा वा हानि नोक्सानी गर्ने उद्देश्यले कीर्ते गर्न वा अर्काको हानि नोक्सानी गर्ने उद्देश्यले नगरे वा नभएको झुट्टा कुरा गरे वा भएको हो भनी वा मिति, अङ्क वा व्यहोरा फरक पारी सहीछाप गरी गराई कागजात बनाई वा बनाउन लगाई जालसाजी गर्न हुँदैन । 
१३. बढी कम वा गलत मूल्याङ्कन गर्न नहुने : कर्जाको धितोस्वरुप बैङ्क वा वित्तीय संस्थामा राखिने चल अचल सम्पत्ति वा गैर बैङ्किङ्ग सम्पत्तिको रुपमा रहेको बैङ्क वा वित्तीय संस्थाको चल वा अचल सम्पत्ति लिलाम बिक्री वा बैङ्क सम्बन्धी अन्य प्रयोजनको लागि मूल्याङ्कन गर्दा मूल्याङ्कनकर्ताले बढी, कम वा गलत मूल्याङ्कन गरी बैङ्क वा वित्तीय संस्थालाई हानि नोक्सानी पुर्याउने कार्य गर्नु हुँदैन । 
१४. अनियमित आर्थिक तथा वित्तीय कारोबार गर्न गराउन नहुने : बैङ्क वा वित्तीय संस्थालाई हानि नोक्सानी 
पुर्याउने उद्देश्यले कसैले पनि कुनै काम गराउन वा नगराउन, मोलाहिजा गर्न वा नगर्न, कुनै किसिमको रकम लिन वा दिन, बिना मूल्य वा कम मूल्यमा कुनै माल, वस्तु वा सेवा लिन वा दिन, दान, दातव्य, उपहार वा चन्दा लिन वा दिन, गलत लिखत तयार गर्न वा गराउन, अनुवाद गर्न वा गराउन वा गैर कानूनी लाभ वा हानि पु¥याउने बदनीयतले कुनै कार्य गर्न वा गराउन हुँदैन । 

परिच्छेद–३ दण्ड सजाय 

१५. दण्ड सजाय : (१) कसैले दफा ३ को खण्ड (क), (ख), (ग), दफा ४ वा दफा ११ बमोजिमको कुनै कार्य गरेमा कसूरको मात्रा अनुसार दश हजार रुपैयाँसम्म जरिबाना हुनेछ । 
(२) कसैले दफा ५, ६ दफा ७ को खण्ड (घ), (ङ), (च), (छ) वा (ज) दफा ८, ९, १०, १२ वा दफा १४ बमोजिमको कुनै कार्य गरेमा त्यस्तो कसूरसँग सम्बन्धित देहाय बमोजिमको बिगो भएमा कसूरको मात्रा अनुसार देहाय बमोजिमको कैद र बिगो भराई बिगो बमोजिम जरिबाना हुनेछ : 
(क) दश लाख रुपैयाँसम्म बिगो भए – एक वर्षसम्म कैद 
(ख) दश लाख रुपैयाँभन्दा बढी पचास लाख रुपैयाँसम्म बिगो भए – एक वर्षदेखि दुई वर्षसम्म कैद 
(ग) पचास लाख रुपैयाँभन्दा बढी एक करोड रुपैयाँसम्म बिगो भए – दुई वर्षदेखि तीन वर्षसम्म कैद 
(घ) एक करोड रुपैयाँभन्दा बढी जतिसुकै बिगो भए पनि – तीन वर्षदेखि पाँच वर्षसम्म कैद 
(३) कसैले दफा ७ को खण्ड (क), (ख), (ग) वा दफा १३ बमोजिमको कुनै कार्य गरेमा कसूरको मात्रा अनुसार त्यस्तो धितोको मूल्याङ्कन बराबरको रकम जरिबाना गरी पाँच वर्षसम्म कैद हुनेछ र त्यस्तो मूल्याङ्कन गर्ने मूल्याङ्कनकर्तालाई मुद्दा हेर्ने अधिकारीले कसूरको मात्रा अनुसार सजाय भुक्तान भएको मितिले तीन वर्षसम्म मूल्याङ्कन गर्न नपाउने गरी रोक लगाउने आदेश दिन सक्नेछ ।  
(४) यस दफा बमोजिम बिगो जफत गरी बिगो कायम गर्न नसकिने अवस्था भएकोमा कसूरको मात्रा अनुसार दश लाख रुपैयाँसम्म जरिबाना र दुई वर्षसम्म कैद हुनेछ । 
(५) कुनै संस्थाले यस ऐन अन्तर्गतको कसूर गरेकोमा त्यस्तो कसूर गर्ने पदाधिकारी वा कर्मचारी पहिचान भएकोमा त्यस्तो पदाधिकारी वा कर्मचारीलाई र पहिचान हुन नसकेकोमा कसूर गरेका बखत त्यस्तो संस्थाको कार्यालय प्रमुखको हैसियतमा काम गर्ने व्यक्ति जिम्मेवार हुनेछ । 
(६) बैङ्किङ्ग कसूर गर्न उद्योग गर्ने व्यक्ति वा संस्था वा त्यस्तो कसूर गर्न अप्रत्यक्ष रुपमा संलग्न व्यक्ति वा संस्था वा त्यस्तो कसूर गर्न सघाउ पु¥याउने व्यक्ति वा कसूर गर्न सघाउ पु¥याउने संस्थाको कर्मचारी वा प्रमुख कार्यकारी पदाधिकारी वा पदाधिकारीलाई कसूरदारलाई हुने सजायको आधा सजाय हुनेछ ।  
१६. बाधा विरोध गर्नेलाई सजाय : यस ऐन अन्तर्गतको अनुसन्धान तथा तहकिकात सम्बन्धी काम कारबाहीमा कसैले बाधा विरोध गरेमा निजलाई अनुसन्धान तथा तहकिकात गर्ने अधिकारीको प्रतिवेदनको आधारमा मुद्दा हेर्ने अधिकारीले छ महिनासम्म कैद वा पाँच हजार रुपैयाँसम्म जरिबाना वा दुवै सजाय गर्न सक्नेछ ।  
 
परिच्छेद–४ मुद्दाको कारबाही र किनारा 

१७. जाहेरी दिने अवधि र हदम्याद : (१) यस ऐन अन्तर्गतको कसूरमा त्यस्तो कसूर भएको कुरा थाहा पाएको मितिले एक वर्षभित्र जाहेरी दिन सकिनेछ र त्यसरी जाहेरी परेको मितिले छ महिनाभित्र नेपाल सरकारले नेपाल राजपत्रमा सूचना प्रकाशन गरी तोकिदिएको अदालत समक्ष मुद्दा दायर गरिसक्नु पर्नेछ ।  
(२) उपदफा (१) मा जुनसुकै कुरा लेखिएको भए तापनि कुनै बैङ्क वा वित्तीय संस्थाको कर्मचारी वा पदाधिकारीले आफु कुनै पदमा बहाल रहेको अवस्थामा बैङ्क वा वित्तीय संस्थाको सम्पत्ति हिनामिना वा हानि नोक्सानी गरी बैङ्किङ्ग कसूर गरेको सम्बन्धमा त्यस्तो कर्मचारी वा पदाधिकारीउपर जहिलेसुकै पनि मुद्दा चलाउन सकिनेछ र यस्तो कर्मचारी वा पदाधिकारीले आफ्नो पदबाट अवकाश प्राप्त गरेपछि पनि मुद्दा चलाउन बाधा पर्ने छैन । 
१८. सरकारवादी हुने : यस ऐन अन्तर्गत सजाय हुने मुद्दा नेपाल सरकारवादी हुनेछ र त्यस्तो मुद्दा सरकारी मुद्दा सम्बन्धी ऐन, २०४९ को अनुसूची–१ मा समावेश भएको मानिनेछ । 
१९. थुनामा राखी कारबाही गर्न सकिने : (१) प्रचलित कानूनमा जुनसुकै कुरा लेखिएको भए तापनि यस ऐन अन्तर्गतको कसूरमा कारबाही चलाइएको कुनै व्यक्तिले कुनै प्रमाण लोप वा नाश गर्न सक्ने वा अनुसन्धान तथा तहकिकातको कारबाहीमा बाधा व्यवधान वा प्रतिकूल असर पार्न सक्ने पर्याप्त कारण विद्यमान भएमा वा नेपालमा स्थायी बसोबास नभएको कुनै व्यक्ति तत्काल प्राप्त प्रमाणबाट छ महिना वा सोभन्दा बढी कैदको सजाय हुन सक्ने बैङ्किङ्ग कसूरको कसूरदार हो भन्ने विश्वास गर्ने कुनै मनासिब आधार भएमा अनुसन्धान तथा तहकिकात गर्ने अधिकारीले निजलाई प्रचलित कानून बमोजिम थुनुवा पुर्जी दिई थुनामा राख्न सक्नेछ । 
(२) उपदफा (१) बमोजिम थुनामा राखिएको व्यक्तिको सम्बन्धमा चौबीस घण्टाभित्र अनुसन्धान तथा तहकिकात पूरा नहुने भई निजलाई थुनामा राखी अनुसन्धान तथा तहकिकात जारी राख्नु पर्ने देखिएमा अनुसन्धान तथा तहकिकात गर्ने अधिकारीले निजलाई मुद्दा हेर्ने अधिकारी समक्ष उपस्थित गराई मुद्दा हेर्ने अधिकारीबाट अनुमति लिएर मात्र थुनामा राख्नु पर्नेछ । 
(३) उपदफा (२) बमोजिम मुद्दा हेर्ने अधिकारीसँग अनुमति माग्दा थुनामा परेको व्यक्तिउपरको अभियोग, त्यसको आधार, निजलाई थुनामै राखी अनुृसन्धान तथा तहकिकात गर्नु पर्ने कारण र निजको बयान कागज भइसकेको भए बयान कागजको व्यहोरा स्पष्ट रुपमा उल्लेख गर्नु पर्नेछ । 
(४) उपदफा (२) बमोजिम थुनामा राख्ने अनुमति मागेमा मुद्दा हेर्ने अधिकारीले सम्बन्धित कागजातहरु हेरी अनुसन्धान तथा तहकिकात सन्तोषजनक रुपमा भए वा नभएको विचार गरी सन्तोषजनक रुपमा अनुसन्धान तथा तहकिकात भइरहेको देखिएमा एकैपटक वा पटक पटक गरी एकपटकमा दश दिनमा नबढ्ने गरी बढीमा पैंतालीस दिनसम्म थुनामा राख्ने अनुमति दिन सक्नेछ । 

परिच्छेद–५ 
विविध 

२०. सहयोग गर्नु पर्ने : यस ऐन अन्तर्गतको बैङ्किङ्ग कसूरको सम्बन्धमा अनुसन्धान तथा तहकिकात गर्दा अनुसन्धान तथा तहकिकात गर्ने अधिकारीलाई आवश्यक सहयोग पुर्याउनु बैङ्क वा वित्तीय संस्था वा सम्बन्धित व्यक्तिको कर्तव्य हुनेछ । 
२१. गोप्यता भङ्ग गरेको आधारमा कारबाही नहुने : प्रचलित कानूनमा जुनसुकै कुरा लेखिएको भए तापनि यस ऐन अन्तर्गतको कसूर भएको वा हुन लागेको विषयमा कानूनी कारबाही अगाडि बढाउन वा त्यस्तो कसूर हुन नदिन आवश्यक सूचना दिने बैङ्क वा वित्तीय संस्थाको कर्मचारी भए निजले गरे वा पुर्याएको सहयोग बापत निजको सेवा शर्त सम्बन्धी कानून अनुसार गोपनीयता भङ्ग गरेको आधारमा कारबाही हुने छैन । 
२२. म्याद तामेल सम्बन्धी व्यवस्था : (१) प्रचलित कानूनमा जुनसुकै कुरा लेखिएको भए तापनि यस ऐन अन्तर्गतको कसूरमा विदेशी व्यक्तिको नाममा म्याद तामेल गर्नु पर्दा त्यस्तो व्यक्तिको नेपालभित्र कुनै किसिमको कार्यालय वा प्रतिनिधि भए त्यस्तो कार्यालय वा प्रतिनिधिको नाममा म्याद तामेल गरिनेछ र त्यसरी तामेल भएको म्याद रीतपूर्वक तामेल भएको मानिनेछ । 
(२) उपदफा (१) बमोजिमको कार्यालय वा प्रतिनिधि नभएमा त्यस्तो व्यक्तिको कारोबार हुने मुख्य स्थान वा निजले स्थायी बसोबास गर्ने ठेगाना वा कारोबार गर्दाको बखत पत्राचारको लागि निजले दिएको कुनै ठेगाना रहेछ भने त्यस्तो ठेगानामा टेलेक्स, टेलिफ्याक्स वा अभिलेख हुन सक्ने दूरसञ्चारका अन्य माध्यम मार्फत वा रजिष्टरी गरी हुलाक मार्फत म्याद तामेल गरिनेछ र त्यसरी तामेल भएको म्याद रीतपूर्वक तामेल भएको मानिनेछ । 
(३) उपदफा (१) वा (२) मा जुनसुकै कुरा लेखिएको भए तापनि विदेशमा रहे बसेको व्यक्तिको नाममा म्याद तामेल गर्न नेपाल सरकार वा नेपाल पक्ष भएको कुनै सन्धिमा छुट्टै व्यवस्था भएको रहेछ भने सोही बमोजिम म्याद तामेल गर्न यस दफाले बाधा पुर्याएको मानिने छैन । 
२३. सूचना प्रकाशन गर्ने : यस ऐन वा अन्य प्रचलित कानून बमोजिम कुनै व्यक्तिको नाममा सूचना पठाउँदा वा म्याद तामेल गर्दा त्यस्तो व्यक्तिको ठेगाना पत्ता नलागी वा अन्य कुनै कारणले त्यस्तो सूचना बुझाउन नसकिएको वा म्याद तामेल हुन नसकेको कुराको प्रतिवेदन पर्न आएमा प्रचलित कानूनमा जुनसुकै कुरा लेखिएको भए तापनि त्यस्तो व्यक्तिलाई तीस दिनसम्मको म्याद दिई अनुसन्धान भएको वा मुद्दा हेर्ने अधिकारी समक्ष मुद्दा दायर भइसकेको भए सो विषयको संक्षिप्त विवरण उल्लेख गरी उपस्थित हुन राष्ट्रिय स्तरको समाचारपत्रमा (विदेशीको हकमा अंग्रेजी दैनिकमा) कम्तीमा दुईपटक सार्वजनिक सूचना प्रकाशन गरिनेछ र त्यसरी सूचना प्रकाशन भएकोमा यस ऐन वा अन्य प्रचलित कानूनमा जुनसुकै कुरा लेखिएको भए तापनि त्यस्तो व्यक्तिलाई रीतपूर्वक सूचना दिइएको वा म्याद तामेल भएको मानिनेछ ।  
२४.विदेशी व्यक्तिको सम्पत्ति रोक्का राख्न आदेश दिने : (१) अनुसन्धान तथा तहकिकात गर्ने अधिकारीले दिएको सूचना वा दफा २२ बमोजिम तामेल भएको म्याद बमोजिम अनुसन्धान तथा तहकिकात गर्ने अधिकारी समक्ष उपस्थित नहुने कुनै विदेशी व्यक्तिको नेपालभित्र कुनै सम्पत्ति, हक, हित वा सरोकार रहेछ भने त्यस्तो व्यक्ति अनुसन्धान तथा तहकिकात गर्ने अधिकारी समक्ष उपस्थित नभएसम्म त्यस्तो सम्पत्ति, हक, हित वा सरोकार अनुसन्धान तथा तहकिकात गर्ने अधिकारीले तोके बमोजिम यथास्थितिमा राख्न वा नेपालबाहिर लैजान नपाउने गरी अनुसन्धान तथा तहकिकात गर्ने अधिकारीले आदेश दिन सक्नेछ र त्यस्तो आदेशको पालना गर्नु सम्बन्धित सबैको कर्तव्य हुनेछ ।  
(२) उपदफा (१) बमोजिमको आदेश पालन नगर्ने व्यक्तिलाई अनुसन्धान तथा तहकिकात गर्ने अधिकारीले एक लाख रुपैयाँसम्म जरिबाना गर्न सक्नेछ र त्यस्तो आदेश पालन नगरेको कारणबाट नेपाल सरकार वा सार्वजनिक संस्थालाई कुनै किसिमको हानि नोक्सानी भएको रहेछ भने सो समेत निजबाट भराइनेछ ।  
२५. मुद्दाको कारबाही र किनारा गर्न बाधा नपर्ने : प्रचलित कानूनमा जुनसुकै कुरा लेखिएको भए तापनि यस ऐन अन्तर्गतको मुद्दा दायर हुनु अगावै वा दायर भएपछि अभियुक्त वा प्रतिवादीको मृत्यु भएमा पनि मुद्दाको कारबाही र किनारा गर्न बाधा पर्ने छैन ।  
२६.सजायको मागदावीमा छूट हुन सक्ने : यस ऐन बमोजिमको अनुसन्धान तथा तहकिकातको काम कारबाहीमा सहयोग गर्ने अभियुक्तलाई अनुसन्धान तथा तहकिकात गर्ने अधिकारीले आफ्नो साक्षीको रुपमा प्रस्तुत गरी निजलाई सजायको मागदावीमा पूर्ण वा आंशिक छूट दिन सक्नेछ । 
तर 
निजले गरेको सहयोग अन्य सबुद वा प्रमाणबाट प्रमाणित नभएमा वा निजले मुद्दा हेर्ने अधिकारी समक्ष अनुसन्धान तथा तहकिकात गर्ने अधिकारीलाई गरेको सहयोग प्रतिकूल हुने गरी बयान दिएमा यस ऐन वा प्रचलित कानूनमा जुनसुकै कुरा लेखिएको भए तापनि निजउपर पुनः मुद्दा दायर गर्न सकिनेछ । 
२७. अयोग्य भएको मानिने : यस ऐन बमोजिम कैदको सजाय पाएको व्यक्ति बैङ्क तथा वित्तीय संस्थाको कर्मचारीको रुपमा काम गर्न अयोग्य भएको मानिनेछ । 
२८. प्रचलित कानून बमोजिम हुने : यस ऐनमा अन्यत्र जुनसुकै कुरा लेखिएको भए तापनि प्रचलित कानून बमोजिम सार्वजनिक पद धारण गरेको व्यक्ति वा राष्ट्रसेवक संलग्न रहेको कसूरमा अख्तियार दुरुपयोग अनुसन्धान आयोग ऐन, २०४८ र भ्रष्टाचार निवारण ऐन, २०५९ बमोजिम कारबाही र सजाय हुने रहेछ भने सोही ऐनहरु बमोजिम कारबाही र सजाय हुनेछ । 
२९. नियम बनाउन सक्ने : यस ऐनको उद्देश्य कार्यान्वयन गर्न नेपाल सरकारले आवश्यक नियमहरु बनाउन सक्नेछ । 
   
नेपाल कानुन आयोगको वेबसाइट बाट साभार गरिएको प्रस्तुत सामाग्री अध्ययन सामाग्रीको रुपमा मात्र लिन सकिनेछ अनुमति बेगर प्रशारण तथा प्रकाशन गर्न कानुनत बन्देज रहेको हुनेछ। 
Read more ...

Thursday, January 27, 2022

Designed By Basanta Subedi